काँकरभिट्टा । भारतसँगको नेपालको पूर्वी सिमा काँकरभिट्टा हुँदै तीन महिनामा एक हजार १०६ जना पर्यटक नेपाल भित्रिएका छन् । असोज महिनामा मात्रै ६०५ जना पर्यटक यस स्थलमार्गबाट नेपाल प्रवेश गरेका हुन् ।
अध्यागमन कार्यालय काँकरभिट्टाका अनुसार चालु आर्थिक वर्ष २०८३।०८४ को साउन महिनामा २ सय ८१ जना र भदौ महिनामा २ सय २० विदेशी पर्यटक यस नाकाबाट नेपाल भित्रिएका छन् ।
यस नाकाबाट भुटान, अमेरिका, अस्ट्रेलिया, बेलायत, बंगलादेश लगायत ५३ देशका पर्यटक यस अवधिमा नेपाल भित्रिएको कार्यालयका प्रमुख तुलसी भट्टराईले बताए । तीन महिनाको पर्यटक आगमन विश्लेषण गर्दा दैनिक सरदर १२ जना विदेशी पर्यटक काँकरभिट्टा नाकाबाट भित्रिने गरेका छन् ।
पर्यटक आगमनको मौसम सुरु भएकाले असोज महिनामा दैनिक सरदर १९ जना विदेशी पर्यटक यस नाकाबाट भित्रिएको पाइएको छ । सबैभन्दा धेरै पर्यटक भुटानबाट भित्रिएका छन् । असोजदेखि फागुन महिनासम्म विदेशी पर्यटकको आगमन धेरै हुने गरेको छ ।
तीन महिनामा भुटानबाट ४ सय ७८ जना, अमेरिकाबाट २ सय ४२ जना, अस्ट्रेलियाबाट ४९ जना, बेलायतबाट ४० जना र बंगलादेशबाट ३५ जना पर्यटक काँकरभिट्टा नाकाबाट नेपाल प्रवेश गरेको कार्यालयका प्रमुख भट्टराईले जानकारी गराउनु भयो ।
यस नाकाको अध्यागमन कार्यालयबाट पर्यटकका लागि भिसा समेत जारी हुने गरेको छ । चालू आर्थिक वर्षको तीन महिनामा ९ सय ९२ जनाको पर्यटक भिसा, ७५ जनाको नाता भिसा, आठ जनाको वैवाहिक भिसा, १३ जनाको गैरआवासीय भिसा र आठ जनाको सार्क इन्डोर्समेन्ट भिसा जारी गरिएको छ ।
काँकरभिट्टा हुँदै तीन महिनामा ९ सय ८५ जना विदेशी नागरिक भारत गएका छन् । जसमा साउनमा ३ सय १८ जना, भदौमा २ सय ३० जना र असोजमा ४ सय ३७ जना विदेशी नागरिक अध्यागमन प्रक्रिया पूरा गरेर भारततर्फ गएका छन् ।
यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
